Tillögur VR myndu kosta ríkissjóð 130 milljarða

Halldór Benjamín Þorbergsson, framkvæmdastjóri Samtaka atvinnulífsins, segir að hugmyndir um að endurskoða fjárhæð persónuafsláttar til samræmis við þróun launavísitölu frá árinu 1990 myndu þýða tekjutap fyrir ríkissjóð upp á að lágmarki 130 milljarða króna á ári. Af þeirri fjárhæð færu um 74 prósent til þeirra tekjuhærri.

Þetta kemur fram í aðsendri grein Halldórs Benjamíns í Markaðnum, fylgiriti Fréttablaðsins um viðskipti og efnahagsmál, en í síðustu viku ályktaði stjórn VR, stærsta stéttarfélags landsins, að markmið félagsins í komandi kjarasamningum yrði að gera lægstu laun skattfrjáls. Það ætti að gera með því að hækka persónuafslátt þannig að hann verði endurskoðaður til samræmis við launavísitölu frá árinu 1990.

Framkvæmdastjóri SA segir tillöguna óraunhæfa. „Persónuafsláttur er 52.907 krónur á mánuði en uppreiknaður miðað við launavísitölu árið 1990 verður hann 112.881 krónur. Við það lækka mánaðarlega skattgreiðslur hvers einstaklings, sem fullnýtir afsláttinn, um tæpar 60 þúsund krónur burt séð frá því hvar hann er í tekjudreifingu. Skattleysismörk myndu þannig hækka úr tæpum 150 þúsund í tæp 320 þúsund á mánuði miðað við fjögurra prósenta framlag launþega í lífeyrissjóð.

Heildarkostnaður aðgerðarinnar væri metinn 130 milljarðar á ári. Til samanburðar er heildarframlag til heilbrigðismála um 190 milljarðar á ári,“ segir í grein Halldórs Benjamíns.

Þá bendir hann á að tillögur um launavísitölutengdan persónuafslátt frá árinu 1990 myndu nánast þurrka upp allar tekjur ríkissjóðs tekjuskatti einstaklinga. „Í fyrra námu þær ríflega 150 milljörðum en yrðu, miðað við breytingarnar, um 20 milljarðar.“