Carter býðst til að hitta Kim Jong-un

Jimmy Carter, fyrrverandi forseti Bandaríkjanna, hefur boðist til þess að ferðast til Norður-Kóreu og hitta leiðtoga ríkisins, Kim Jong-un, til að ræða varanlegan frið á Kóreuskaga.

Park Han-shik, prófessor í alþjóðastjórnmálum við Georgíuháskóla, segir Carter hafa komið að máli við sig vegna þessa. Breska blaðið Guardian greinir frá málinu.

Líklegt þykir þó að tilboði hins 93 ára Carter verði fálega tekið í Hvíta húsinu þar sem Donald Trump Bandaríkjaforseta gæti þótt tekið fram fyrir hendur sér þegar kemur að því að eiga við málefni Norður-Kóreu.

Carter gegndi embætti Bandaríkjaforseta á árunum 1977 til 1981. Hann hlaut friðarverðlaun Nóbels árið 2002.