Ferðamenn beðnir að hafa varann á

Lægðardrag á Grænlandssundi kemur til með að dýpka í dag, en víðáttumikill hæðarhryggur yfir Íslandi eflist. Þessi tvö veðurkerfi valda því að hvessir mjög á landinu af vestri og nær vindur stormstyrk á Vestfjörðum, Norðurlandi og Suðausturlandi með kvöldinu.

Að sögn veðurfræðings á Veðurstofunni geta vindhviður orðið mjög öflugar, jafnvel náð 30 til 40 m/s við fjöll á þeim slóðum. Hann segir þó að hitatölur verði með ágætum miðað við árstíma og úrkoma með minnsta móti.

Þá eru ferðamenn á Suðausturlandi beðnir að hafa varann á næsta sólarhring, því áfram verður hvassviðri eða stormur og víða rigning fyrir hádegi á morgun, þó dragi smám saman úr veðurhæð og vætu þegar líður á daginn. Á kosningadaginn er síðan spáð norðankalda með kólnandi veðri og éljum fyrir norðan og austan, en haustsól og mildara veður á Suður- og Vesturlandi.

Veðurhorfur á landinu næstu daga

Á föstudag:

Suðvestan og vestan 15-23 m/s, hvassast syðst og víða talsverð rigning, en dregur heldur úr vindi og styttir upp með kvöldinu, fyrst V-lands. Hiti 5 til 10 stig.

Á laugardag:

Norðan 10-18 m/s, hvassast við A-ströndina. Él á Norður- og Austurlandi, en annars léttskýjað. Kólnandi veður.

Á sunnudag:

Hægir vindar og bjartviðri með hita kringum frostmark. Vaxandi suðaustanat og þykknar upp SV-til síðdegis og hlýnar.

Á mánudag:

Suðvestlæg átt, dálítil væta og milt veður, en þurrt að mestu NA-lands.

Á þriðjudag:

Útlit fyrir hvassa vestlæga vinda, slyddu eða snjókomu og kólandi veður.

Á miðvikudag:

Lægir líklega og léttir víða til, en frost víða um land.