Vala Matt og Rósa í eld­húsinu: Hollar og bragð­góðar kar­töflu­flögur

Í Íslandi í dag í kvöld fer Vala Matt og heimsækir Rósu Guðbjartsdóttur, stjórnmálakonu og rithöfund, í Hafnarfjörðinn. Rósa hefur mikið spáð í umhverfisvernd og umhverfisvænt heimilishald í gegnum tíðina.

Hún býr meira að segja svo vel að vera með hænur í garðinum sínum og gefur þeim

matarúrgang heimilisins og fær svo ný egg á hverjum degi. Í þætti kvöldsins kennir Rósa okkur meðal annars að búa til dásamlegar hollar kartöfluflögur úr glænýjum kartöflum sem tekur enga stund að gera.

Og svo kom hún Völu skemmtilega á óvart með því að sýna okkur hvernig við getum einnig nýtt kartöfluhýðið sem snakk.

„Og af því að Rósa vill helst ekki nota neinar snyrtivörur með eiturefnum kennir hún okkur líka að búa til einfaldan en mjög virkan og góðan náttúruvænan andlitsskrúbb,“ segir Vala.

Meðfylgjandi er uppskrift að hollu kartöfluflögunum hennar Rósu.

Aðferð: Skrælið kartöflurnar og skerið í örþunnar sneiðar. Skolið í vatni og þerrið síðan vel. Setjið kartöflurnar í skál og veltið þeim upp úr olíunni og kryddinu.

Raðið sneiðunum loks upp á grillteina og hafið bil á milli þeirra. Leggið teinana ofan á eldfast form. Hitið í örbylgjuofni í 6 til 10 mínútur eða þar til flögurnar eru orðnar stökkar og góðar.

KARTÖFLUHÝÐI

Skolið kartöflur og þerrið og skrælið. Veltið hýðinu upp úr olíu og kryddið að smekk. Leggið á bökunarplötu og bakið í ofni í um 25 mínútur við 200 gráður.

KARTÖFLUFLÖGUR

4 kartöflur

1 msk. olía

Krydd eftir smekk, t.d. paprikuduft,

chiliduft eða salt