Fyrrverandi ráðherrar Katalóníu mæta fyrir dómara í Madríd

Fyrrverandi ráðherrar héraðsstjórnar Katalóníu mættu í morgun fyrir rétt í Madríd til yfirheyrslna vegna ásakana um uppreisn gegn spænska ríkinu og fjárdrátt. Eiga þeir yfir höfði sér allt að þrjátíu ára dóm, verði þeir fundnir sekir.

Alls mættu níu manns fyrir rétt en Carles Puigdemont, fyrrverandi forseti héraðsstjórnarinnar, og fjórir til viðbótar hunsuðu boðunina. Saksóknarar segja að mögulegt sé að gefin verði út handtökuskipun á hendur fólkinu. Puigdemont heldur nú til í Belgíu og hefur sagt að um pólitísk réttarhöld sé að ræða.

Spánarstjórn hefur tekið yfir stjórn héraðsins og boðað til kosninga til héraðsþings þann 21. desember næstkomandi. Þing Katalóníu lýsti yfir sjálfstæði héraðsins í síðustu viku, en stjórnlagadómstóll Spánar hefur ógilt yfirlýsinguna.

Fólkið hefur ekki verið formlega ákært en dómari þarf að taka afstöðu þess hvort þau verði sett í gæsluvarðhald á meðan á rannsókn stendur sem gæti síðar leitt til réttarhalda. Dómarinn gæti einnig úrskurðað að þau verði látin laus, gegn því að þau skili inn vegabréfum sínum.