BBC fjallar um hvernig Íslendingar fengu unglinga til að hætta að drekka og dópa

Árangur Íslendinga í að koma böndum yfir drykkju og fíkniefnaneyslu unglinga er umfjöllunarefni myndskeiðs sem breska ríkisútvarpið BBC birtir. Þar eru nefndar fimm leiðir sem Íslendingar fóru sem skiluðu sér í stórminnkaðri unglingadrykkju.

Í myndbandinu kemur fram að unglingadrykkja hafi verið stórt vandamál á Íslandi á 9. og 10. áratug síðustu aldar. Þannig hafi 42% unglinga á aldrinum 15-16 ára sagst hafa orðið drukkin árið 1998. Síðan þá hafi mikill árangur náðst og þetta hlutfall sé nú komið niður í  5%.

Rætt er við Dag B. Eggertsson, borgarstjóra Reykjavíkur, Ingu Dóru Stefánsdóttur, prófessor við Háskólann í Reykjavík, foreldra og ungmenni um þessar fimm leiðir sem sagðar eru hafa skilað þessum árangri.

„Á tuttugu árum fór Reykjavík úr því að vera versta borgin hvað varðaði unglingadrykkju, reykingar og fíkniefnaneyslu í að vera sú besta. Það er svolítið ótrúlegt, er það ekki?“ segir Dagur við BBC.

Útivistartími fyrir börn og rannsóknir á líðan á meðal lykilþátta

Þær fimm leiðir sem stuðluðu að „unglingabyltingu“ á Íslandi að sögn BBC eru meðal annars útivistartími barna og heit sem foreldrar skrifa undir um að setja börnum sínum reglur. Þá sé börnum og ungmennum haldið uppteknum með íþróttum og öðrum tómstundum.

Allt þetta byggist á traustum vísindum, meðal annars rannsóknum á líðan barna og neyslu þeirra á vímuefnum sem gerðar eru árlega.

„Börn vilja ekki neyta eiturlyfja. Þau vilja eiga hamingjurík og heilbrigð líf,“ segir Inga Dóra sem stendur að rannsóknarröðinni Ungt fólk.

Að síðustu segir BBC að lykillinn hafi verið að fá stjórnmálamenn til að taka á vandanum. Þannig kemur fram að Reykjavíkurborg verji meira en hundrað milljónum dollara í æskulýðsstarf á ári.

Dagur slær á létta strengi og tengir þessi verkefni við að Íslendingar hafi borið sigurorð af Englendingum í sextán liða úrslitum Evrópumótsins í knattspyrnu í fyrra.

„Við unnum sennilega England á Evrópumótinu  út af þessu verkefni,“ segir borgarstjóri og skellihlær.