Sögulegt hjá Rodgers

Brendan Rodgers varð í gær fyrsti þjálfari Celtic til þess að vinna fjóra titla í röð í skoska boltanum síðan Jock Stein gerði það.

Það eru 47 ár síðan Stein náði þessum árangri og þó svo Celtic hafi mikla yfirburði á Skotlandi þá er afrekið mikið.

Celtic varð þá deildabikarmeistari er liðið vann 2-0 sigur á Motherwell.

Þetta var í sjötta sinn sem þessi lið mætast í úrslitaleiknum og aldrei hefur Motherwell unnið. Það vann síðast þennan titil árið 1950.

Celtic er nú búið að spila 65 leiki í röð í Skotland án þess að tapa og titlarnir detta inn hver á fætur öðrum.