Hæstiréttur snýr við fangelsisdómi í fjárdráttarmáli

Níu mánaða skilorðsbundnum fangelsisdómi yfir framkvæmdastjóra einkahlutafélags fyrir að hafa dregið að sér rúmar 79 milljónir króna var snúið við í Hæstarétti í dag.  Hæstiréttur taldi að ákæruvaldið hafði ekki sýnt fram á að maðurinn hefði ekki aðeins verið að koma sér undan að greiða opinber gjöld.

Maðurinn var sakaður um að hafa dregið að sér tugi milljóna úr félaginu sem hann átti helmingshlut í, vann hjá og var í forsvari fyrir. Hann hefði greitt reikninga vegna byggingar húss og framkvæmda við iðnaðarhúsnæði í sinni eigu af bankareikningi félagsins. Þá hafi hann fært fjármuni yfir á eigin reikninga, stundum með þeim skýringum að um væri að ræða laun til sín.

Héraðsdómur Suðurlands dæmdi manninn í níu mánaða skilorðsbundið fangelsi í júní í fyrra. Hann áfrýjaði dómnum til Hæstaréttar. Krafðist hann meðal annars frávísunar á þeim forsendum að ríkisskattstjóri hefði þegar bætt álagi við gjaldstofna við endurákvörðun gjalda hans. Með því væri verið að lögsækja hann að nýju fyrir brot sem hann hefði þegar verið sakfelldur fyrir í trássi við mannréttindasáttmála Evrópu.

Því hafnaði Hæstiréttur. Álag ríkisskattstjóra hafi varðað skil mannsins á efnislega röngum skattframtölum. Í þessu máli væri hann ákærður fyrir fjárdrátt.

Rannsókn málsins áfátt

Aftur á móti átaldi Hæstiréttur rannsókn sérstaks saksóknara, forvera embættis héraðssaksóknara. Henni hefði verið áfátt og engin teljandi gögn hefðu verið lögð fram um fjárhag félagsins, færslur í bókhaldi þess eða stöðu einstakra reikningsliða þar á mismunandi tímum.

Ekkert lægi fyrir um afdrif þeirra eigna sem færðar hefðu verið í bókhaldi félagsins á síðari stigum og ákæruvaldið ekkert leitt í ljós um þau atvik sem gætu falið í sér að maðurinn hefði tileinkað sér þau verðmæti að einhverju eða öllu leyti.

Væri því ósannað að tilgangur mannsins hefði verið annar en sá að koma sér undan því um sinn að greiða opinber gjöld af endurgjaldi fyrir vinnu sína í þágu félagsins og annarri úthlutun verðmæta frá því. Var maðurinn því sýknaður af kröfum ákæruvaldsins.

Ríkið þarf jafnframt að greiða allan sakarkostnað í héraði og áfrýjunarkostnað við málið.