United Silicon fær framlengingu á greiðslustöðvun

Héraðsdómur Reykjaness veitti í dag hlutafélaginu Sameinað Sílikon, eiganda United Silicon, áframhaldandi greiðslustöðvun til 22. janúar 2018. Kísilverksmiðjan fékk í ágúst frest sem rann út í dag, 4. desember.

Markaðurinn, fylgirit Fréttablaðsins, greindi frá því um daginn að yfir greiðslustöðvunartímann hafi kostnaður Arion banka, stærsta hluthafa félagsins, numið 600 milljónum króna. Stofnendur United Silicon, þar á meðal fyrrverandi forstjórinn Magnús Garðarsson, fóru á sínum tíma fram á að Héraðsdómur Reykjavíkur stöðvaði yfirtöku Arion banka. 

Fyrir það hafði bankinn stefnt Magnúsi fyrir grun um meint stórfelld auðgunarbrot og skjalafals sem rekja mætti aftur til ársins 2014 eða þegar framkvæmdir við kísilverið hófust.

Umhverfisstofnun stöðvaði í byrjun septembermánaðar starfsemi Sameinaðs Sílikons en í aðdraganda þess höfðu borist ríflega eitt þúsund kvartanir frá íbúum Reykjanesbæjar vegna mengunar. Í tilkynningu stofnunarinnar sagði að frávik frá starfsleyfi United Silicon væru alvarleg.

Tap Arion banka

Arion banki er stærsti lánveitandi kísilversins og gekk hann um miðjan september að veðum í fyrirtækinu og tók hlutabréf yfir. Bankinn og fimm lífeyrissjóðir sem fjárfestu í United Silicon eiga í dag 98 prósent í félaginu. Afkoma bankans á fyrstu níu mánuðum þessa árs var neikvæð um 100 milljónir, einkum vegna niðurfærslu á lánum, kröfum og öðrum eignum sem tengjast United Silicon. Þær nema um 4,8 milljörðum samtals.

Höskuldur H. Ólafsson, bankastjóri Arion banka, lét þá hafa eftir sér að draga þurfti lærdóm af málinu. „Málið átti sér langan aðdraganda og fyrir lágu öll leyfi og samningar um uppbyggingu verksmiðjunnar, orkukaup, helstu aðföng og sölu afurða. Engu að síður er ljóst að draga þarf lærdóm af því hvernig til hefur tekist og það munum við gera. Áfram verður unnið að því að koma starfsemi verksmiðjunnar í gott horf í sátt við samfélagið.“