Vatnavextir og 11 stiga hiti

Búast má við talsverðri og sums staðar mikilli rigningu á sunnanverðu landinu seinni partinn í dag og í kvöld. Hlýnað hefur hratt á landinu í nótt og því víða hláka í dag og hætt við vatnavöxtum í ám og lækjum. Gular viðvaranir eru því í gildi fyrir Suður- og Suðausturland og segir Veðurstofan að það verði einkum mikil rigning í kringum Mýrdals- og Eyjafjallajökul seinni partinn í dag og fram á kvöld.

Landsmenn geta gert ráð fyrir rigningu um nær allt land í dag. Veðurstofan áætlar að það haldist þurrt fram að hádegi á Norðausturlandi en að þar verði vart við vætu eftir því sem líður á daginn. Vindurinn verður suðlægur og á bilinu 8 til 15 metrar á sekúndu. Hitinn verður 3 til 11 stig, hlýjast á Austurlandi.

Það verður svo suðvestan 10 til 18 m/s og víða skúrir eða él á morgun. Það verður hvassast við sjávarsíðuna en hægari og léttir til fyrir austan. Hinn yfirleitt á bilinu 0 til 5 stig.

Veðurhorfur á landinu næstu daga

Á þriðjudag:

Suðvestan 10-15 m/s og víða él, en yfirleitt bjartviðri eystra. Hiti yfirleitt 0 til 4 stig.

Á miðvikudag:

Suðvestan 13-20 m/s, hvassast syðst og éljagangur, en léttskýjað A-lands. Hiti kringum frostmark.

Á fimmtudag:

Stíf vestanátt, dálítil él og áfram svalt í veðri.

Á föstudag:

Suðlæg átt með rigningu og hlýindum.

Á laugardag (Þorláksmessa):

Útlit fyrir suðvestanátt með snjómuggu eða éljum, en bjart með köflum fyrir austan. Víða vægt frost.

Á sunnudag (aðfangadagur jóla):

Líklega norðlæg átt, él á víð og dreif og kólnandi veður.