Björgvin Páll á leið til Danmerkur

Landsliðsmarkvörðurinn Björgvin Páll Gústavsson er búinn að semja við danska úrvalsdeildarfélagið Skjern.

Þessi tíðindi voru staðfest á heimasíðu Skjern í dag. Samningur Björgvins við félagið er til tveggja ára en hann gengur í raðir félagsins næsta sumar.

Björgvin staldrar því stutt við hjá Haukum eða aðeins eina leiktíð. Markvörðurinn er orðinn 32 ára gamall. Í samtali við heimasíðu Skjern segist Björgvin vera mjög spenntur fyrir þessu verkefni.

Liðið er á toppi dönsku úrvalsdeildarinnar í dag og hefur alla burði til þess að gera það gott næstu árin. Tandri Már Konráðsson er leikmaður félagsins þannig að Björgvin Páll verður ekki eini Íslendingurinn þar næsta vetur.