Ábendingar um málefni útlendinga og innflytjenda látnar falla niður

Ríkisendurskoðun ítrekar ekki sjö ábendingar til innanríkis- og velferðarráðuneytis sem hún gerði árið 2015 í nýrri eftirfylgniskýrslu um málefni útlendinga og innflytjenda. Vísar stofnunin meðal annars til nýrra laga um útlendinga og að fjárlagagerð vegna málefna útlendinga hafi tekið jákvæðum breytingum.

Ábendingarnar voru settar fram í skýrslu Ríkisendurskoðunar um Málefni útlendinga og innflytjenda á Íslandi árið 2015. Í tilkynningu nú bendir stofnunin á að síðan sú skýrsla kom út hafi verið samþykkt ný lög um útlendinga og ályktun um framkvæmdaáætlun í málefnum innflytjenda. Velferðarráðuneyti hafi unnið að framgangi áætlunarinnar. Ríkisendurskoðun hvetur ráðuneytið að vinna markvisst að markmiðum hennar.

Þá hefur dómsmálaráðherra sett reglugerð um útlendinga en með henni var Útlendingastofnun falið að starfrækja móttökustöð fyrir hælisleitendur og lágmarksréttindi hælisleitenda skilgreind. Fjárlagagerð vegna málefna útlendinga hefur einnig tekið jákvæðum breytingum frá árinu 2015 að mati Ríkisendurskoðunar. Stofnunin telur þó að tryggja þurfi að áætlanir séu raunhæfar og að kostnaður verði í samræmi við fjárveitingar.

Í janúar samþykkti Alþingi beiðni tíu þingmanna um skýrslu frá Ríkisendurskoðun um starfsemi Útlendingastofnunar. Ríkisendurskoðun hefur orðið við beiðninni og stefnir að því að birta niðurstöður í opinberri skýrslu til Alþingis í september 2018.