Var skíthræddur

Söngvakeppnin 2018 hefst þann 10. febrúar með fyrra undanúrslitakvöldinu. Þann 17. febrúar fer síðan fram seinna kvöldið.

Keppninni lýkur svo með úrslitakeppni í Laugardalshöll þann 3. mars og fer sigurvegarinn fyrir Íslands hönd í Eurovision í Lissabon í maí.

Tólf atriði taka þátt í Söngvakeppninni að þessu sinni og mun Lífið ræða við flytjendur úr hverju atriði. Allir fengu þeir sömu spurningar og er nú komið að Ara Ólafssyni sem flytur lagið Heim 10. febrúar í Háskólabíói.  

Af hverju ákvaðst þú að taka þátt?

„Ég hef mikla trú á Þórunni Ernu, hef unnið með henni áður sem leikstjóra en hún er frábær laga- og textahöfundur og algjör reynslubolti í þessu öllu. Mér leist líka mjög vel á lagið, það er grípandi, fallegt og kraftmikið. Mig hefur líka alltaf langað til að taka þátt í Eurovision.“

 

Af hverju ætti íslenska þjóðin að kjósa þig?

„Af því að þetta er frábært lag! Við viljum leyfa tónlistinni og söngnum að vera í aðalhlutverki í þetta skiptið. Þetta er fallegt lag með sterkan boðskap sem höfðar til allra í heiminum held ég. Mér og okkur sem verðum á sviðinu finnst virkilega gaman að syngja lagið og ætlum að leyfa því að njóta sín sem best í sviðsframkomunni og vonandi skila því frá hjartanu.“

 

Uppáhalds íslenska Eurovision lag og af hverju ?

„Það var eiginlega hann Daði Freyr (hvað með það) sem á 1. sætið í mínum huga uppáhalds íslenska Eurovision lagið. Hann átti bara fyrst og fremst gott lag, hann kom rosa vel fram og átti bara sviðið í mínum huga.“

Eftirminnilegasta Eurovison minningin?

„Þegar Lordi frá Finnlandi unnu 2006.  Söngvarinn var ótrúlega flottur en ég var samt svo hræddur við hann. Fyrsta hugsun þegar minnst er á Eurovision er alltaf þessi sterka upplifun að vera skíthræddur hahaha.“

Uppáhalds erlenda Eurovision lag og af hverju ?

„Fairytale með Alexander Rybak. Hann er bara svo fáránlega flottur og með mesta sjarmann í Evrópu held ég bara, enda heillaði hann alla upp úr skónum. Grípandi laglína og einlægni, mér finnst það langflottast.“

Um hvað fjallar lagið?

„Lagið fjallar um það að það verða allir fyrir sársauka einhvern tímann á lífsleiðinni en við sjáum það ekki utan á fólki endilega hvernig því líður, en allir eiga sér sína sögu. Við ættum að hjálpa hvoru öðru og koma vel fram við hvort annað því við vitum aldrei hvenær við gætum sjálf þurft á hjálp að halda. Við höfum öll þetta val, að koma vel fram við aðra. Lagið var samið á ensku upphaflega og heitir Our choice. Íslenski textinn fer aðeins meira inní persónulega sögu og heitir Heim.“



Lag: Heim / Our Choice

Höfundur lags: Þórunn Erna Clausen

Höfundur íslensks texta: Þórunn Erna Clausen

Höfundur ensks texta: Þórunn Erna Clausen

Flytjandi: Ari Ólafsson



Hér að neðan má heyra lagið á ensku, Our Choice.

Hér að neðan má síðan sjá nýtt tónlistarmynd frá Ara við lagið á íslensku, Heim.