Dómari sem sparkaði í leikmann settur í hálfs árs bann | Myndband

Franski dómarinn Tony Chapron mun ekki dæma fótbolta næsta hálfa árið en hann hefur skrifað nafn sitt í sögubækurnar fyrir að komast í bann fyrir að sparka í leikmann.

Í leik Nantes og PSG í síðasta mánuði var óvart stigið á hæla dómarans með þeim afleiðingum að hann datt. Chapron brást hinn versti við og sparkaði í leikmanninn sem hafði rekist í hann, Diego Carlos. Hann lét ekki þar við sitja heldur gaf honum sitt annað gula spjald í leiknum og sendi hann í bað.

Chapron var strax sendur í leyfi eftir leikinn og aganefnd franska knattspyrnusambandsins hefur nú ákveðið að réttast sé að vera með hann í banni næsta hálfa árið.

Seinna spjaldið á Carlos hefur verið dregið til baka að ósk Chapron. Leikmaðurinn sleppur því við bann.

Chapron er 45 ára gamall og hefur dæmt í frönsku úrvalsdeildinni síðan 2004. Hann hefur dæmt yfir 400 leiki í deildinni. Þetta tímabil átti að vera hans síðasta í boltanum og þar sem hann fær ekki að dæma meira í vetur er ferli hans lokið á skrautlegan hátt.

Affaire Tony Chapron : grâce à cette palette, on découvre que Diego Carlos avait fait le jeu du rond à l'arbitre  https://t.co/MwW4yfGbE0#Canalbis@JordietMartinpic.twitter.com/3mKSkCihOT

— CANAL+ (@canalplus) January 17, 2018