Snýtti sér í 5.000 rúblu seðil

„Ég hefði getað gefið fátækum þessa peninga en ég ætla ekki að gera það því ég er með nefrennsli,“ skrifaði rússneski fótboltamaðurinn Stanislav Manayev sem er búinn að gera allt vitlaust í heimalandinu.

Hann birti myndband af sér þar sem hann er að snýta sér í 5.000 rúblu seðil, tæpar 10 þúsund krónur, og lét orðin af ofan flakka með myndbandinu.

Hinn 19 ára gamli Manayev lét svo seðilinn falla á gólfið. Liðsfélögum hans hjá FC Tolso til mikillar skemmtunar. Eins og við mátti búast hafa fjölmargir gagnrýnt leikmanninn og þar á meðal íþróttamálaráðherra Rússlands.

Manayev eyddi myndbandinu á endanum en það var of seint. Það er til alls staðar og má sjá hér að neðan.