Rúmlega 17 þúsund milljarðar til kínverska hersins

Kínverjar munu verja 1,1 billjón júönum, eða um 17.559 milljörðum íslenskra króna, í hernaðarmál á næsta ári. Forsætiráðherra Kína tilkynnti um upphæðina, sem er um 8 prósenta aukning til málaflokksins frá síðasta ári, í ræðu sinni frammi fyrir kínverska þinginu í Peking.

Forsætisráðherrann, Li Keqiang, tilkynnti einnig að stefnan væri sett á 6,5 prósenta hagvöxt á árinu.

Kínverski kommúnistaflokkurinn lagði nýlega til að fella úr gildi ákvæði í stjórnarskrá landsins sem takmarkar setu einstaklings á forsetastóli við tvö fimm ára kjörtímabil. Xi Jinping, forseti Kína, myndi því geta haldið embætti sínu eins lengi og hann hefur heilstu til.

Þrátt fyrir að tillagan sé umdeild er ekki gert ráð fyrir öðru en að hún verði samþykkt, ef marka má fagnaðarlæti þingmanna í morgun þegar tillagan var formlega lesin upp í þingsalnum. Verði hún að veruleika mun Xi óumdeilanlega vera merkasti leiðtogi Kínverja síðan Mao Tse-tung var og hét.

Xi Jinping, sem er fæddur árið 1953, er sonur eins stofnenda Kínverska kommúnistaflokksins. Staða hans í Kína er gífurlega sterk en undir lok október í fyrra voru stefna hans og hugsjónir festar í lög Kommúnistaflokksins.