Ari Ólafsson vann Söngvakeppnina

Ari Ólafsson vann Söngvakeppni Sjónvarpsins í kvöld. Hann hafði betur gegn Degi Sigurðssyni í einvígi í úrslitum Söngvakeppninnar. 

Ari flutti lagið Our Choice en Dagur flutti lagið Í stormi.

Greinilegt er að Ari vann talsvert á í einvíginu því Dagur vann fyrri umferðina með miklum yfirburðum. Dagur fékk 20.183 stig frá dómurum keppninnar, sem voru sjö talsins, og Ari 17.453 atkvæði. Frá áhorfendum fékk Dagur 24.547 atkvæði í fyrri umferðinni en Ari 18.408 atkvæði.

Atkvæðaskiptingin í einvíginu var ekki lesin upp þegar úrslitin voru kynnt í beinni útsendingu.

„Ég vil bara segja, þetta er kærleikur og ást og tónlist kemur okkur öllum saman. Og við erum öll saman hérna og þetta er yndisleg stund og þetta er mikilvægt hvað það er mikil ást í loftinu og ég vil bara segja takk kærlega fyrir Ísland þetta er svo fallegt af ykkur, ég elska ykkur svo mikið,“ sagði Ari á sviðinu eftir að úrslitin höfðu verið tilkynnt.

Hér fyrir neðan má sjá flutning Ara á laginu Our Choice í úrslitunum í kvöld. 

Ari mun stíga á svið fyrir Íslands hönd í Altice Arena á fyrra undankvöldi Eurovision þann áttunda maí næstkomandi. Þessum unga söngvara bíður það erfiða verkefni að koma Íslendingum í úrslit Eurovision, en síðastliðin þrjú ár hefur það ekki tekist.

En hver er þessi ungi söngvari?

Ari er aðeins nítján ára gamall, fæddur árið 1998.

Hann hefur sungið síðan hann man eftir sér en vakti fyrst talsverða athygli þegar hann lék Oliver Twist í Þjóðleikhúsinu árið 2009, þá ellefu ára gamall.

„Ég vissi ekki að ég hefði söngrödd fyrr en ég lék það hlutverk,“ sagði Ari í viðtali við Fréttablaðið árið 2016. 

Hann hóf nám í Söngskólanum í Reykjavík eftir sýninguna, fyrst hjá Garðari Cortes en síðan hjá Bergþóri Pássyni.

Þrettán ára gamall söng hann með norsku stjörnunni Sissel Kyrkjebø í Eldborgarsal tónlistarhússins Hörpu. Um var að ræða lagið The Prayer sem meðal annars Andrea Bocelli og Celine Dion hafa sungið saman.

Hann tók tvisvar þátt í söngkeppni Menntaskólans í Hamrahlíð og var í Ísland Got Talent hjá Stöð 2 og í fyrstu þáttaröðinni af The Voice.

Í desember síðastliðnum fékk Ari þær fréttir að hann hefði komist inn í The Royal Academy of Music í London, elsta tónlistarskóla þar í landi og einn af þeim virtari í veröldinni.

Hann sagði frá þessu í viðtali við Fréttablaðið í desember en þar ljóstraði hann því einnig upp að hann væri skyldur söngsystkinunum Diddú og Páli Óskari, en amma Ara og faðir Páls Óskar og Diddúar voru systkini.