Úrskurðaður látinn eftir að hafa fundist meðvitundarlaus á götuhorni

Karlmaður á fertugsaldri, sem fannst meðvitundarlaus á horni Kirkjuvegar og Vestmannabrautar aðfararnótt mánudags, var úrskurðaður látinn á sjúkrahúsi eftir lífgunartilraunir. Mbl greindi fyrst frá málinu.

Heiðar Hinriksson, varðstjóri hjá lögreglunni í Vestmannaeyjum, staðfestir í samtali við Vísi að maðurinn hafi fundist meðvitundarlaus á götuhorninu og síðar úrskurðaður látinn. Þá er ekkert sem bendir til þess að andlát mannsins hafi borið að með saknæmum hætti.

Enn er ekkert vitað um dánarorsök en að sögn Heiðars er málið nú í rannsókn.