Rússneskir þingmenn íhuga viðskiptabann á Bandaríkin

Rússar gætu brugðist við refsiaðgerðum Bandaríkjastjórnar með því að banna innflutning á bandarískum vörum og fjárfestingum. Hópur þingmanna hefur lagt fram frumvarp þess efnis í rússneska þinginu og til stendur að taka það til umræðu í næstu viku.

Bandarískur hugbúnaður, landbúnaðarvörur, lyf, tóbak og áfengi gætu orðið fyrir barðinu á mótaðgerðum Rússa samkvæmt frumvarpinu. Þá leggja þingmennirnir til að hætta samstarfi við bandarísk stjórnvöld um kjarnorku, eldflaugar og flugvélasmíði og banna bandarískum fyrirtækjum að taka þátt í einkavæðingu rússneskra ríkisfyrirtækja.

Stirt hefur verið á milli rússneskra stjórnvalda og vestrænna ríkisstjórna af ýmsum sökum undanfarið. Þar ber helst stuðningur Rússa við ríkisstjórn Bashars al-Assad í Sýrlandi og taugaeitursárás á rússneskan fyrrverandi njósnara og dóttur hans á Bretlandi.

Við þetta bætist innlimun Rússlands á Krímskaga í Úkraínu árið 2014 og ásakanir um tilraunir þeirra til afskipta af kosningum í vestrænum ríkjum, þar á meðal Bandaríkjunum.

Frumvarpið sem liggur fyrir rússneska þinginu nú er hugsað sem andsvar við refsiaðgerðum sem Bandaríkjastjórn tilkynnti um í síðustu viku. Þær voru þær hörðustu frá Krímskagadeilunni. Ekki liggur fyrir hvort að frumvarpið nýtur stuðnings ríkisstjórnar Vladimírs Pútín forseta.

Reuters-fréttastofan segir að stjórnvöld í Kreml noti þingið stundum til að senda skilaboð til erlendra ríkja. Þau skilaboð leiði ekki alltaf til beinna aðgerða.