„Hann segir mjög oft brandara, þó þeir séu ekki alltaf mjög fyndnir“

Í þættinum Ísland í dag á Stöð 2 í gærkvöldi var nærmynd af Degi B. Eggertssyni, borgarstjóra Reykjavíkur. Þar var rætt við fólk sem er náið honum og lýsir Jón Gnarr, fyrrverandi borgarstjóri, honum sem lífsglöðum manni.

„Hann er þrautseigur, skemmtilegur og hefur eðlislega jákvæðni,“ segir Jón.

„Ég hef aldrei hitt mann sem hefur jafn mikla ástríðu fyrir þessari borg,“ segir leikkonan Ilmur Kristjánsdóttir.

Dagur fæddist 19. júní í Osló árið 1972. Hann flutti stuttu síðar heim til Íslands og hóf nám við Árbæjarskóla. Þaðan fór hann í Menntaskólann í Reykjavík þar sem hann varð stúdent árið 1992. Því næst fór hann í læknisfræðina og lauks síðan meistaraprófi í mannréttindum og alþjóðalögum við Háskólann í Lundi árið 2005.

„Fyrir það fyrsta fannst mér hann bara hrikalega sætur, skemmtilegur og klár,“ segir Arna Dögg Einarsdóttir, eiginkona Dags, en hún starfar sem læknir. Þau kynntust árið 1998.

Dagur og Arna eiga saman fjögur börn.

„Þrátt fyrir langa vinnudaga þá er hann mjög til staðar fyrir börnin. Við leggjum mikið upp úr því að borða morgunmat saman, borða kvöldmat saman og eiga svona okkar fjölskyldustundir.“

„Hann segir mjög oft brandara, þó þeir séu ekki alltaf mjög fyndnir. En ég dáist að því hvað honum finnst hann sjálfur fyndinn. Stundum hittir hann í mark, kannski einn af hverjum tíu bröndurum hitta alveg í mark,“ segir Ilmur og bætir því við að sumir brandarar fari einfaldlega hringinn og verði í raun fyndnir.

„Þetta eru í raun þríaura brandarar og í sjálfu sér bara mjög fyndið hvað þetta er lélegt,“ segir Jón Gnarr en Dagur segir í samtali við Ásgeir Erlendsson í þættinum í gær: „Jón sagði stundum við mig þegar við vorum að fara á fund kannski með Orkuveitunni. „Eigum við ekki að láta fagmennina um grínið.“

Dagur hefur verið borgarstjóri í Reykjavík frá júní 2014. Arna segir að Dagur sér gríðarlega rómantískur.

Gallarnir eru þeir að Dagur eigi til með að einangra sig, þegar álagið er mikið. Þannig lýsir Ilmur honum.

Hér að neðan má sjá umfjöllun Íslands í dag frá því í gærkvöldi.