Skoða hundruð flugvéla eftir óhugnanlegt flugslys

Bandarísk flugmálayfirvöld hafa fyrirskipað skoðun á hreyflum að minnsta kosti 220 flugvéla í kjölfar banaslyss um borð í farþegaflugvél þar sem hreyfill sprakk í vikunni. Kona lést eftir að hún sogaðist næstum út um glugga sem brotnaði af völdum braks úr hreyflinum.

Blöð CFM56-7B-hreyfla eins og þess sem sprakk verða skoðuð með ómsjá innan sex mánaða samkvæmt tilskipun Flugmálastofnunar Bandaríkjanna (FAA), að sögn Reuters-fréttastofunnar. Skoðunin nær til hreyfla sem notaðir hafa verið í tilteknum fjölda flugtaka. Aðrir hreyflar sömu tegundar verða skoðaðir á næstu átján mánuðunum.

Talið er að blað hafi gefið sig vegna málmþreytu og valdið sprengingunni í hreyfli vélar bandaríska flugfélagsins Southwest Airlines á þriðjudag.

Flugfélagið staðfesti í dag að það hefði sent farþegum um borð í vélinni fimm þúsund dollara ávísanir, jafnvirði rúmrar hálfra milljónar íslenskra króna. Þá hefðu þeir fengið inneign í flug hjá félaginu að andvirði þúsund dollara, um hundrað þúsund íslenskra króna.

Alls voru 149 farþegar um borð í vélinni sem var á leið frá New York til Dallas. Vélinni var nauðlent í Pennsylvaníu eftir að hreyfillinn sprakk aðeins um tuttugu mínútum eftir flugtak. Dánardómstjóri sagði að konan hefði látist af miklum höggáverkum á höfði, hálsi og búk. Þetta var fyrsta banaslysið í farþegaflugi í Bandaríkjunum í níu ár.