Skotið yfir markið á Laugardalsvelli

Eitt af 25 bestu landsliðum heims spilar á velli sem er ekki boðlegur. Laugardalsvöllur er fjárhagsleg byrði á KSÍ og þarf Reykjavíkurborg um fyrirsjáanlega framtíð að niðurgreiða völlinn á hverju ári. Innviðir eru úreltir, miðaframboð er takmarkað, skortur er á aðstöðu og innviðum sem hefur áhrif á upplifun stuðningsmanna. Þetta er meðal þess sem kemur fram í ellefu skýrslum sem birtar hafa verið um nýjan þjóðarleikvang. Þegar núverandi staða er skoðuð sést að aðgerða er þörf.

Unnt væri að gera ýmsa bragarbót á núverandi aðstöðu til að uppfylla lágmarkskröfur og er gert ráð fyrir að slíkt myndi kosta um 500 milljónir og upp í einn milljarð króna. Það myndi þó ekki tryggja að hægt væri að leika á vellinum í mars og nóvember þegar ný Þjóðardeild verður sett á laggirnar né heldur fyrirbyggja taprekstur

KSÍ, ríkið og Reykjavíkurborg hafa stofnað undirbúningsfélag sem á að undirbúa lokaákvörðun um nýjan þjóðarleikvang. Á meðan kerfið vinnur á sínum hraða mun eitt af 25 bestu landsliðum heims spila á velli sem stenst ekki alþjóðlegar kröfur og rekstrarforsendur hans eru ekki ásættanlegar. Í einni af skýrslunum kemur fram að nýr þjóðarleikvangur verði ekki reistur nema stofnkostnaður sé að miklu leyti reiddur fram af hinu opinbera.

Nýr þjóðarleikvangur kom fyrst í alvöru umræðu haustið 2015 þegar KSÍ gerði forhagkvæmniskönnun. Í apríl ári síðar var gerð viðskiptaáætlun og í framhaldinu var ráðist í enn frekari áætlanagerð og ítarlega þarfagreiningu, einkum með tilliti til framkvæmdakostnaðar. Vorið 2017 var ráðist í lokaáfanga hagkvæmniathugunar þar sem meðal annars voru skoðuð mismunandi form eignarhalds og fjármögnunar. Leitað var til innlendra og erlendra sérfræðinga en tekið var sérstaklega fram að þeir erlendu ættu það sameiginlegt að hafa komið að uppbyggingu fjölda leikvanga.

Eftir alla þessa vinnu var mælst til þess að halda áfram með verkefnið. Ráðgjafarsviði KPMG var falið það hlutverk að greina og áhættumeta rekstrar- og samfélagslegar forsendur. Skýrsla KPMG byggir meðal annars á gögnum og upplýsingum frá verkkaupum, stjórnendum Borgarbrags, Pétri Marteinssyni og Guðmundi Kristjáni Jónssyni og ráðgjöfum ráðgjafarfyrirtækisins Lagardère Sports, sem rekur um 80 leikvanga víðs vegar um heim.

Í skýrslu sinni telur KPMG að ýmsum áætlunum og gögnum sem lögð hafa verið fram sé nokkuð ábótavant en viðskiptalíkanið virðist trúverðugt. Þó er bent á að Lagardère Sports gæti haft mikilla hagsmuni að gæta verði verkefnið að veruleika sem kalli á skynsamlega rýni helstu hagsmunaaðila í ráðleggingar fyrirtækisins.

Í fyrirhugaðri tímalínu um nýjan völl er gert ráð fyrir að nýr Þjóðarleikvangur verði reistur árið 2021. Laugardalsvöllur tekur tæplega 9.800 manns í númeruð sæti, og þegar hann fyllist eru tekjur af seldum miðum nálægt 30 milljónum króna. Síðastliðin fimm ár hefur nánast alltaf verið uppselt á keppnisleiki A-liðs karla. Þrátt fyrir að þetta séu síðustu leikir fyrir HM er nóg til af miðum, bæði á Noregsleikinn og leikinn gegn Gana, hvort sem það er veðrið eða verðið sem veldur, en fjögurra manna fjölskylda þarf að reiða fram 14-30.000 krónur.