Aðskilnaður barna og foreldra illa ígrunduð ákvörðun: „Það eru brjálæðisleg gróðasjónarmið á bak við þetta“

Þetta var illa ígrunduð ákvörðun, hún var illa undirbúin og það var ekki búið að afla henni fylgis. Þetta segir Silja Bára Ómarsdóttir, prófessor í stjórnmálafræði, um framferði Bandaríkjastjórnar sem hefur síðustu vikur skilið að börn ólöglegra innflytjenda og foreldra þeirra.

Silja segir að svo virðist sem Donald Trump, forseti Bandaríkjanna, hafi ákveðið að skrifa undir forsetatilskipunina án þess að gera félögum sínum í Repúblikanaflokknum viðvart. Í tilskipuninni felst að hætt verði að aðskilja fjölskyldur við landamæri Mexíkó og Bandaríkjanna eins og verið hefur síðustu vikur.

„Talsmenn Trumps voru úti um allar koppagrundir að verja þessa stefnu og framfylgd hennar og á meðan er Trump að snúa stefnunni við í Hvíta húsinu. Þetta er svo óreiðukennt að maður veit ekki hvar maður á að grípa niður,“ segir Silja sem bætir við að undirritunin sé enn einn liðurinn í leikhúsi fáránleikans því mikið af gagnrýni Trumps á Barack Obama, forvera hans í starfi, hafi gengið út á að hann hefði alltaf verið að taka ákvarðanir með forsetatilskipunum.

„Hann gerir það nánast á hverjum degi, liggur við.“

Ekki stefna heldur mannréttindabrot

Silja segir að það sé í raun erfitt að kalla þetta stefnu því í raun séu þetta mannréttindabrot. Það sé ekki víst að hægt verði að koma fjölskyldunum saman á ný.

„Það er enginn hægur vegur að koma þessum 2300 börnum aftur til sinna foreldra vegna þess að framkvæmdin hefur verið svo óreiðukennd. Það er ekkert víst að yngstu börnin þekki foreldra sína aftur – þó þetta sé stuttur tími fyrir fullorðna manneskju.“

Þetta sé grimmúðleg stefna og ekki sjái fyrir endann á afleiðingum hennar.

Fjárhagslegir hagsmunir í húfi

Eftir að málið komst í hámæli spurði Silja sig hvaða fjárhagslegu hagsmunir liggi að baki stefnunni. Silja segir að fyrirtæki, sem eru verktakar hjá hernum, hafi að undanförnu auglýst eftir starfsfólki vegna þess að þau reikna með uppgripum í byggingu og rekstri einangrunarrýma fyrir börn. 

„Það eru brjálæðisleg gróðasjónarmið sem eru á bak við þetta“.

Leið til að kynda undir ótta hjá þjóðernissinnum

Silja vekur athygli á því að það styttist í kosningar, sem eru í nóvember, og sá litli stuðningur sem þó var fyrir aðskilnaði barna og foreldra hafi verið mestur hjá hvítum karlmönnum sem ekki hafi háskólamenntun og að þangað hafi Trump sótt fylgi sitt. „Þetta er leið til þess að keyra upp ótta hjá þjóðernissinnum til þess að virkja kjósendur til fylgis við sig í grófustu útfærslunni.“

Engin mynstur önnur en óreiða

Fræðasamfélagið hefur haft mikið verk á sínum höndum því fræðimenn þurfa að greina atburði síðastliðinna vikna. Silja segir að sem fræðimaður leiti hún alltaf í mynstur, til að mynda hafi hún geta greint ákveðin mynstur og skýra stefnu hjá George W. Bush sem hafi haft ákveðna kjölfestu sem menn gátu þá verið annað hvort fylgjandi eða mótfallnir.

Það sama sé ekki uppi á teningnum með Trump því það séu engin önnur mynstur en óreiða. „Stjórnmálastíllinn er óreiða. Mynstrið er óreiða. Kannski er einhver hugsun þarna einhvers staðar á bakvið en maður getur hvorki spáð fyrir um hvernig og hvenær þegar kemur að Trump,“ segir Silja sem heldur áfram:

„Það er engin þekking. Það er engin sýn. Það er engin lífsspeki.“

Einu merkin sem eru alveg skýr að mati Silju er þjóðernisrembingur. „Það er verið að kynda undir þjóðernishyggju og það eru forsendur til að vekja fasískar tilhneigingar og að vinna á þeim grundvelli.“