Grísk píta með ljúffengu nautakjöti og tzatziki sósu

Einfalt með Evu fór í loftið á Stöð 2 í kvöld en í þáttunum matreiðir Eva Laufey Kjaran Hermannsdóttir frábæra en á sama tíma einfalda rétti. Uppskriftirnar verða ávallt aðgengilegar hér á Vísi.

Hér að neðan má lesa hvernig maður gerir réttinn.

„Pítur eru ómótstæðilega góðar og þessi píta með grískum blæ er sérlega góð. Nautakjötið verður ferskara með mintunni og tzatziki sósunni. Það er líka mikið sport fyrir hvern og einn að setja saman sína eigin pítu eftir smekk hvers og eins,“ segir Eva Laufey.

• 600 g nautakjöt
• 1 msk ólífuolía
• 2 stk hvítlauksrif
• 1 tsk paprikukrydd
• 1 tsk cuminkrydd
• Salt og pipar
• 1 msk smátt söxuð minta
• Börkur af hálfri sítrónu
• Pítubrauð
• Ferskt salat
• Agúrka
• Svartar ólífur
• Rauðlaukur
• Hreinn fetaostur
• 1 skammtur tzatziki sósa, uppskrift hér að neðan
  
  Aðferð:

1. Skerið nautakjötið í jafn þykkar sneiðar.
2. Kryddið kjötið með paprikukryddi, cuminkryddi, salti, pipar, smátt saxaðri mintu og rífið niður börk af hálfri sítrónu yfir.
3.  Sáldrið ólífuolíu yfir kjötið og steikið á mjög heitri pönnu í 3 – 4 mínútur á hvorri hlið. Hvílið kjötið í lágmark fjórar mínútur áður en þið skerið það niður.
4. Setjið kjötið á fallegan bakka eða disk og berið fram með pítubrauði, tzatziki sósu, grænmeti og hreinum fetaosti.
   
   Tzatziki sósa

• ½ agúrka
• 300 g grískt jógúrt
• 2 hvítlauksrif
• 1 msk smátt söxuð minta
• 1 tsk hunang
• 2 msk sítrónusafi
• Salt og pipar
  
  Aðferð:

1. Setjið gríska jógúrt í skál, rífið niður agúrku og hvítlauk og blandið vel saman.
2. Saxið niður mintu og bætið henni einnig saman við ásamt hinum hráefnunum.
3. Blandið öllum hráefnum afar vel saman og smakkið ykkur til með salti og pipar.