Víða túnskemmdir hjá bændum á Suðurlandi vegna mikilla rigninga

Nýræktir bænda á Suðurlandi eru víða skemmdar ef ekki ónýtar vegna mikilla rigninga í sumar. Á bæ undir Eyjafjöllum er þrjátíu hektara nýrækt nánast ónýt og tjón búsins um þrjár milljónir króna sem fæst ekki bætt.

Eins og allir vita þá verður sumarsins 2018 minnst sem rigningasumarsins mikla, ekki síst á Suðurlandi.

Bændur hafa sérstaklega fengið að kenna á því enda erfitt heyskaparsumar að baki og þá eru nýræktir víða mjög illa farnar, eins og t.d á bænum Núpi undir Eyjafjöllum þar sem víða má finna djúp hjólför eftir dráttarvélar sem komust ekkert áfram vegna mikillar bleytu í nýrækt frá því í fyrra.

„Þetta átti að vera svona eins og allar nýræktir, sparitún, rennislétt og búið að eyða á þriðju milljón króna í að ýta og setja ofan í skurði. Svo gerist það í sumar að það ringdi og ringdi eins og allir vita.“

„Hér fór allt á flot þannig að í fyrri slætti þegar það var verið að slá og hirða þá fóru vélarnar á bólakaf eins og sést víða á nýræktinni. Þegar það var verið að hirða rúllur var ekki hægt að fylla vagnana af rúllum vegna þyngdar, þá festust traktorarnir ítrekað og nú er túnið allt sundurskorið og það er bara ónýtt“, segir Berglind Hilmarsdóttir, bóndi á Núpi undir Eyjafjöllum.

Hún segir að endurrækta þurfi túnið allt með tilheyrandi kostnaði næsta vor. Berglind segir skemmdirnar mjög svekkjandi.

„Þetta er ömurlegt en þetta er góð áminning um það, það er málsháttur sem segir; „Mennirnir ákveða en guð ræður“ en þegar maður er bóndi getur maður sagt „Mennirnir ákveða en veðrið ræður“.

Þetta er bara svona út um allan heim, bóndinn gerir eitthvað og svo kemur veðrið og sker úr um hvort við fáum einhverja uppskeru sem þýðir það líka í framhaldinu hvort fólk fái yfir höfuð mat, svona er nú matvælaframleiðslan fullkomlega háð veðurfarsskilyrum.



Fyrir norðan kól tún fyrir nokkrum árum, fyrir sunnan drukknuðu tún, þannig að núna erum við bara með ónýt tún“, bætir Berglind við.

Berglind segist aldrei á sínum búskaparárum hafa lent í öðrum eins uppskerubresti eins og í sumar vegna rigninga, hvað þá að nýræktir hafa skemmst með því að spólast allar upp.