Ógnaði manni með eggvopni og tók af honum síma

Um klukkan 23:15 í gærkvöldi var tilkynnt um rán í Garðabæ. Þar hafði manni verið ógnað með eggvopni og komst þjófurinn á brott með síma og fleira sem maðurinn hafði með sér. Gerandi var handtekinn skömmu síðar og var vistaður í fangageymslu lögreglu vegna rannsóknar málsins. Þetta kemur fram í dagbók lögreglunnar á höfuðborgarsvæðinu.

Mikill erill var hjá lögreglu í gær og í nótt en í tilkynningu kemur fram að fangageymslur við Hverfisgötu séu fullar eftir nóttina. Sökum þess hefur þurft að vista einstaklinga í fangageymslum í Hafnarfirði, alls fjórtán manns.