Margrét í stjórn Alþjóðasambands endurskoðenda

Margrét Pétursdóttir, sviðsstjóri á endurskoðunarsviði EY, var kosin í stjórn IFAC, Alþjóðasambands endurskoðenda, á fundi þess í Sydney í Ástralíu þann 2. nóvember síðastliðinn.

Í tilkynningu frá EY kemur fram að IFAC samanstandi af 175 endurskoðunarfélögum í um 130 löndum og að baki standa félagsmenn sem telja 3 milljónir endurskoðenda. 

Margrét verður fulltrúi Íslands og Norræna endurskoðunarsambandsins (NRF) sem stóð að framboði hennar.

„Á síðustu árum hefur Margrét sérhæft sig sífellt meira í endurskoðun fjármálafyrirtækja og hefur Margrét jafnframt undirbúið stjórnarmenn í fjármálafyrirtækjum á Íslandi fyrir hæfismat hjá Fjármálaeftirlitinu.

Margrét hefur verið gæðaeftirlitsmaður hjá EY og á vegum Félags löggiltra endurskoðenda, FLE. Margrét var formaður FLE á árunum 2015-2017 og formaður Norræna endurskoðunarsambandsins á árinu 2017,“ segir í tilkynningunni.