Sautján ára stúlka látin eftir átök við aðra stúlku

Sautján ára stúlka er látin eftir að hún lenti í átökum við aðra stúlku í sænska bænum Trollhättan fyrr í dag. Stúlkan sem grunuð er um að hafa orðið hinni að bana, er einnig yngri en átján ára og er nú í umsjá félagsmálayfirvalda.

Lögreglu barst tilkynning um málið skömmu fyrir klukkan 15 að staðartíma í dag, en slagsmálin eiga að hafa átt sér stað í húsi í hverfinu Torsred. Önnur stúlknanna var þá flutt alvarlega slösuð á sjúkrahús þar sem hún lést af sárum sínum.

Hans Lippens, talsmaður sænsku lögreglunnar, segir að lögregla hafi nokkuð skýra mynd af því sem á að hafa gerst, meðal annars eftir samtöl við sjónarvotta og aðstandendur. Lögregla hyggst þó ekki greina frá framvindu mála við fjölmiðla að svo stöddu.

Lögregla rannsakar málið sem morð eða manndráp.