Íslenska landsliðið í fótbolta æfði á Stade Roi Badoin-vellinum í Brussel í morgun en þar fer leikurinn gegn Belgíu í Þjóðadeild UEFA fram annað kvöld.
Ljóst er að Birkir Bjarnason verður ekki með vegna meiðsla og því voru aðeins 22 sem æfðu í dag en Birkir Már Sævarsson æfði einn með Friðriki Ellert Jónssyni sjúkraþjálfara. Hann er tæpur fyrir leikinn á morgun.
Eins og vanalega var létt yfir strákunum okkar í Brussel í dag en eftir stutta tölu frá Erik Hamrén hófst æfingin með hefðbundinni upphitun sem stýrt var af Sebastian Boxleitner.
Þjóðarleikvangur Belganna er alls ekkert fyrir augað og í raun bara rosalega ljótur en menn eru hreinlega hissa á að eitt besta landslið heims spili á svona velli.
Búist er við ríflega 30.000 manns á leikinn á morgun en Belgarnir eru búnir að selja 30.000 miða og þá verða Íslendingarnir um 400. Völlurinn tekur 50.000 þannig það stefnir ekki í fullan völl annað kvöld.
Leikurinn verður í beinni útsendingu á Stöð 2 Sport HD og hefst útsendingin klukkan 19.00.
Strákarnir æfðu á keppnisvellinum í morgun | Birkir æfði einn
Tengdar fréttir
Í beinni: Hamrén og Aron Einar sitja fyrir svörum í Brussel
Landsliðsþjálfarinn og landsliðsfyrirliðinn svöruðu spurningum blaðmanna í Brussel.
Aron Einar: Þurfum að sýna karakter og koma sterkir til baka
Landsliðsfyrirliðinn á von á erfiðu verkefni á móti Belgíu á fimmtudaginn.
Birkir Bjarnason úr leik og Aron Elís kemur inn
Birkir Bjarnason er enn einn fastamaðurinn í landsliði Íslands sem missir af leikjunum á móti Belgíu og Katar.
