Sjaldgæft að lokað sé fyrir viðskipti eftir ábendingu frá FME

Kauphöllin hefur fjórum sinnum á síðustu fimm árum stöðvað viðskipti með bréf í félagi á íslenska hlutabréfamarkaðnum. Þetta kemur fram í svari Páls Harðarsonar, forstjóra Kauphallarinnar, við fyrirspurn fréttastofu.

Viðskipti með bréf Icelandair voru stöðvuð klukkan 10:21 í morgun en opnað fyrir viðskipti að nýju í hádeginu eftir að Icelandair sendi frá sér tilkynningu. Þar kom fram að ólíklegt sé að búið verði að uppfylla alla fyrirvara á kaupum félagsins á WOW air fyrir hluthafafund á föstudag.

Bréf í Icelandair Group lækkuðu í verði um tæplega sex prósent í dag. Viðskipti með bréf í félaginu námu um 233 milljónum króna.