Lögreglumaður stunginn með hníf í miðborg Brussel

Lögreglumaður var stunginn með hníf í miðborg belgísku höfuðborgarinnar Brussel í morgun. Blaðið Le Soir segir málið rannsakað sem hryðjuverkaárás, en stunguárásin átti sér stað við Kolenmarkt, nærri torginu Grand Place.

Innanríkisráðherra Belgíu, Jan Jambon, kallaði í morgun árásina „huglausa árás gegn lögreglumönnum okkar“. Lögreglumaðurinn dvelur nú á sjúkrahúsi, en er ekki talinn í lífshættu.

Belgískir fjölmiðlar segja að árásarmaðurinn hafi verið skotinn og er hann alvarlega særður. Óstaðfestar heimildir herma að árásarmaðurinn hafi hrópað „Allahu akbar“, eða „Guð er mikill“, fyrir árásina.

Dómsmálaráðherra landsins segir að þrátt fyrir að málið sé rannsakað sem grunuð hryðjuverkaárás sé í augnablikinu ekkert sem bendi til tengsla árásarmannsins og öfgahópa.