Hreppti 131 milljón og þar með stærsta vinning frá upphafi

Íslenskur spilari hafði heppnina með sér í kvöld þegar dregið var í EuroJackpot og hreppti rúma 131 milljón króna. Um er að ræða stærsta vinning sem Íslendingur hefur unnið í happdrættinu. Þetta kemur fram í tilkynningu frá Íslenskri getspá.

Þrátt fyrir gríðarháa upphæðina var ekki um að ræða fyrsta vinning, heldur annan, og skiptist hann á milli Íslands og Þýskalands, að því er segir í tilkynningu.

Íslenski milljónamiðinn var seldur í Happahúsinu í Kringlunni. Aðalvinningur EuroJackpot gekk einnig út í kvöld en sá miði var seldur í Danmörku.