Grun­sam­legar manna­ferðir við í­búðar­hús og sveita­bæi á Norður­landi

Lögreglunni á Norðurlandi eystra hafa nú um helgina verið að berast tilkynningar um grunsamlegar mannaferðir í umdæmi, í og við íbúðarhús sem og sveitabæi.

Á Facebook-síðu lögreglunnar segir að þetta minni talsvert á stöðuna sem kom upp fyrr á árinu þar sem óprúttnir aðilar fóru víða um í ýmis húskynni í þeim erindagjörðum að ná sér í verðmæti og voru flestir þeirra af erlendu bergi brotnir.  

Tvær tilkynningar hafa borist um helgina þar sem brotist hefur verið inn í íbúðarhús og einhverju stolið. Brýnt er fyrir fólki að vera á varðbergi og láta vita um grunsamlegar mannaferðir. Ef um grunsamleg ökutæki er að ræða er einnig mælst til þess að fólk skrái niður hjá sér númer þeirra.