Auður átti kvöldið

Stefán Þór Hjartarson skrifar 13. desember 2018 08:30

Plata Auðs, Afsakanir, hefur fengið góða dóma. Aðrir verðlaunahafar voru Bagdad Brothers fyrir Jæja, Elli Grill fyrir Pottþétt Elli Grill, GDRN fyrir Hvað ef, Kælan mikla fyrir Nótt eftir nótt og ROHT fyrir Iðnsamfélagið og framtíð þess.

Auðunn Lúthersson, sem kallar sig Auð, byrjaði daginn á að fá verðlaun Kraums og frumsýndi svo myndbönd við fimm lög af verðlaunaplötunni sinni – sem gekk þó ekki þrautalaust fyrir sig því að bilun í Bíó Paradís olli því að myndböndin voru spiluð á Húrra.

Dómnefnd mat 343 plötur og báru sex þeirra af að gæðum, metnaði og frumleika. Fréttablaðið/Sigtryggur Ari

Kraumsverðlaunin

Kraumsverðlaunin eru ekki bundin ákveðinni tónlistarstefnu og þeim fylgja engir undirflokkar. Allar útgáfur íslenskra listamanna eru gjaldgengar til verðlaunanna – hvort sem þær koma út á geisladisk, vínyl eða á netinu. Listamenn og hljómsveitir þurfa ekki að sækja sérstaklega um að plötur þeirra séu teknar til greina af dómnefnd eða greiða þátttökugjald. Verðlaunin voru fyrst veitt árið 2008 og hefur verið úthlutað árlega síðan.

Árni Matthíasson, formaður dómnefndar. Í dómnefnd voru Andrea Jónsdóttir, Anna Ásthildur Thorsteinsson, Arnar Eggert Thoroddsen, Benedikt Reynisson, Birna María Másdóttir, Helga Þórey Jónsdóttir, Jóhann Ágúst Jóhannsson, Sandra Barilli, Trausti Júlíusson og Óli Dóri.

Aðstandandi verðlaunanna er Kraumur tónlistarsjóður sem starfræktur er á vegum Auroru velgerðarsjóðs. Kraumur hefur það að meginhlutverki að efla íslenskt tónlistarlíf, fyrst og fremst með stuðningi við unga listamenn, auðvelda þeim að vinna að listsköpun sinni og koma verkum sínum á framfæri innan lands sem utan.

Andrea Jóns fyrir miðju. Hjónin Skúli Helgason og Anna Lind Pétursdóttir.

Í tilkynningu frá aðstandendum verðlaunanna kemur fram að verðlaunaplöturnar í ár spanni ýmsar tónlistarstefnur og strauma, allt frá poppi og hipphopptónlist yfir í rokk og harðkjarna noise tónlist.

Henrý Alexander Henrýsson og Regína Bjarnadóttir litu inn.

Tólf manna dómnefnd, skipuð fólki sem hefur margvíslega reynslu af því að fjalla um, spila og vinna með íslenska tónlist í fjölmiðlum og á öðrum vettvangi sá um að velja vinningshafa. Valið var úr 343 íslenskum plötum og segir í tilkynningunni að greinilegt sé að mikil gróska er í íslensku tónlistarlífi.

Alls hafa 57 hljómsveitir og listamenn hlotið Kraumsverðlaunin frá því þau voru fyrst veitt árið 2008, meðal annars Agent Fresco, Lay Low, Mammút, Moses Hightower og Hjaltalín.

Eva Einarsdóttir, Eldar Ástþórsson og sjö mánaða dóttir þeirra voru brosandi kát með verðlaun Kraums.

Myndbandið sem aldrei sást í Bíó Paradís

Auður hugðist frumflytja tuttugu mínútna tónlistarmyndband við alls fimm lög í Bíó Paradís. Eftir nokkra seinkun reyndist ekki unnt að sýna myndbandið þar og stefndi þá tónlistarmaðurinn gestum sínum á krána Húrra þar sem hann lofaði að hægt yrði að sýna listaverkið.

Þrátt fyrir örlitla hnökra var gleðin við völd í Bíói Paradís þar sem spenntir aðdáendur hans höfðu safnast saman til að sjá og heyra.