Klopp býður 104 ára gömlum stuðningsmanni Liverpool á völlinn

Ef einhver á skilið að vera boðið á leik hjá Liverpool þá er það hinn 104 ára gamli Bernard Sheridan sem hefur stutt félagið í 96 ár eða síðan 1923.

Sá gamli er nýbúinn að fagna enn einu afmælinu og fékk þá bréf frá sjálfum Jürgen Klopp, stjóra Liverpool. Þar þakkaði Klopp fyrir stuðninginn í að verða heila öld og bauð honum á völlinn.

Sheridan mun mæta á völlinn með fjölskyldu sinni og þar á meðal með syni sínum sem kemur frá Kanada til þess að taka þátt í þessari stund.

„Ég hef verið stoltur stuðningsmaður Liverpool síðan ég var strákur. Staðið með félaginu í gegnum súrt og sætt. Það verður æðislegt að fara á leikinn og toppurinn verður svo þegar við vinnum leikinn,“ sagði Sheridan.