0,05 prósenta hlut vantaði upp á

Aðeins vantaði 0,05 prósenta hlut upp á til þess að krafa félaga í eigu Ingibjargar Stefaníu Pálmadóttur, forstjóra Torgs, og fleiri hluthafa Haga um að margfeldiskosningu yrði beitt við stjórnarkjör smásölurisans næði fram að ganga. Þetta herma heimildir Markaðarins.

Hluthafar sem ráða yfir minnst 10 prósentum hlutafjár geta kallað eftir margfeldiskosningu en fram kom í tilkynningu frá stjórn Haga síðdegis í gær að tilskildum hluta hefði ekki verið náð. Verður meirihlutakosningu því beitt við stjórnarkjörið.

Samtals tólf hluthafar, sem eiga samtals liðlega 10,5 prósenta hlut í smásölufélaginu en þar af eiga félög tengd Ingibjörgu Stefaníu 4,3 prósenta hlut, kröfðust þess að margfeldiskosningu yrði beitt við stjórnarkjörið á hluthafafundi félagsins sem verður haldinn á föstudag. Samkvæmt heimildum Markaðarins taldi stjórn Haga hins vegar að umboð eins aðila til þess að fara með atkvæðarétt á fundinum, vegna framvirks samnings, hefði verið ófullnægjandi.

Að sögn viðmælenda Markaðarins gætir nokkurrar óánægju á meðal sumra hluthafa með þá niðurstöðu stjórnarinnar.

Margfeldiskosning virkar á þann veg að gildi hvers atkvæðis er margfaldað með fjölda þeirra stjórnarmanna sem kjósa skal, sem eru fimm í tilfelli Haga, og má hluthafi skipta atkvæðamagni sínu, þannig reiknuðu, í hverjum þeim hlutföllum sem hann sjálfur kýs á jafn marga menn og kjósa skal eða færri.

Átta manns hafa gefið kost á sér í stjórn Haga, þar á meðal Jón Ásgeir Jóhannesson, fjárfestir og eiginmaður Ingibjargar Stefaníu, en einn frambjóðandi, Sandra Hlíf Ocares, lögfræðingur og sjálfstætt starfandi ráðgjafi, bættist í hópinn um liðna helgi.

Torg ehf., útgefandi Fréttablaðsins, er að stærstum hluta í eigu Ingibjargar Stefaníu Pálmadóttur.