Viðbrögð Geirs við könnun kvöldsins: Hef enga trú á þessum tölum

Miðað við könnun íþróttadeildar verður Guðni Bergsson áfram formaður KSÍ en hann berst um formannsstólinn við Geir Þorsteinsson á ársþingi KSÍ sem fer fram á laugardaginn.

Könnun íþróttadeildar var fyrst birt í kappræðum Geirs og Guðna á Stöð 2 Sport í kvöld.

„Ég trúi ekki þessari spá eða þessum tölum. Ég held að þetta endurspegli ekki þá stöðu sem er í hreyfingunni,“ voru fyrstu viðbrögð Geirs í þættinum í kvöld áður en Guðni var spurður álits:

„Ég hef fundið mikinn meðbyr og mikinn stuðning við mínum málflutningi. Ég er mjög bjartsýnn en þetta er heldur hærra en ég bjóst við. Ég er þakklátur fyrir stuðninginn og þetta lítur vel út. Maður verður að segja það.“

Geir er þó hvergi nærri hættur og ætlar að halda áfram baráttu sinni fram á laugardaginn.

„Ég hef góða tilfinningu fyrir þessu á laugardaginn en ég hef enga trú á þessum tölum,“ sagði Geir.