Stuðningsmenn Chelsea bauluðu á Jorginho

Stuðningsmenn Chelsea hafa ekki bara snúist gegn stjóranum Maurizio Sarri heldur líka gegn manninum sem hann tók með sér frá Ítalíu, Jorginho.

Chelsea vann öruggan 3-0 sigur á Malmö í Evrópudeildinni í gær og þegar Jorginho var skipt inn af bekknum fyrir Ross Barkley bauluðu stuðningsmenn Chelsea á hann.

„Við sáum á fyrstu 30 mínútum leiksins hversu mikilvægur hann er fyrir okkur. Við vorum í vandræðum með að spila okkur út úr pressunni. Það er alltaf auðveldara með Jorginho á vellinum og ég vonaði að stuðningsmenn okkar skildu það. Hann er mjög mikilvægur,“ sagði Sarri frekar sár eftir leikinn.

Almennt er talið að Sarri verði rekinn fyrr frekar en síðar og ljóst að stuðningsmenn Chelsea vilji að hann taki Jorginho með sér aftur til Ítalíu.