Özil verður áfram inn og út úr liði Arsenal

Mesut Özil, miðjumaður Arsenal, var aðeins í byrjunarliði Arsenal í annað sinn á árinu í gær er liðið tók á móti BATE Borisov í Evrópudeild UEFA.

Arsenal komst áfram í keppninni með 3-0 sigri og Özil spilaði í 90 mínútur í fyrsta sinn síðan í desember.

„Andinn var góður hjá honum í dag og hann náði vel saman við nokkra leikmenn. Við þurfum á öllum mönnum að halda og það var mikilvægt og jákvætt að geta teflt Özil fram í dag,“ sagði Unai Emery, stjóri Arsenal, og bætti við að Özil yrði áfram stundum í liðinu og stundum á bekknum.

Félagar Özil hjá Arsenal hrósuðu honum í hástert eftir leikinn og sögðu hann vera í heimsklassa. Þeir vissu vel hvað hann gæti eftir að æfa með honum á hverjum degi.