Íhugar að endurvekja bólusetningatillögu: „Eitthvað þurfum við að gera“

Hildur Björnsdóttir, borgarfulltrúi Sjálfstæðisflokksins, íhugar að leggja aftur fram tillögu þess efnis að almennar bólusetningar verði gerðar að skilyrði fyrir inntöku barna á leikskólum borgarinnar.  Hildur lagði fram slíka tillögu í september á síðasta ári en hún var felld með þrettán atkvæðum gegn tíu. Hildur var í viðtali í Reykjavík síðdegis í dag.

Nýverið hafa borist fregnir af mislingatilfellum hér á landi eftir að mislingasmit kom upp um borð í flugvélum Icelandair og Air Iceland Connect þann 14. og 15. febrúar. Fjögur mislingasmit hafa verið staðfest hér á landi í kjölfarið, tveir fullorðnir og tvö börn.

Sjá einnig: Afar sérstakt að svo margir smitist af mislingum í einu

Hildur segir full ástæða vera til að velta því fyrir sér hvort tillagan eigi erindi á borð borgarstjórnar á ný eftir fréttir síðustu daga. Hún hafi lagt tillöguna fram síðasta haust eftir að Alþjóða heilbrigðisstofnunin sendi frá sér tilkynningu vegna mislingafaraldar í Evrópu og kallaði eftir aðgerðum.

„Við erum að sjá það að tíðni bólusettra barna á Íslandi fer minnkandi og það er ekki vegna þess að þeim foreldrum sem eru á móti bólusetningum fari fjölgandi heldur virðist vera sem fólk sé bara hreinlega að gleyma sér,“ segir Hildur og bætir við að tillagan gæti orðið til þess að fólk yrði meðvitaðara um bólusetningar ef það væri skilyrði fyrir leikskólaplássi.

Sjá einnig: Segir eftirfylgni bólusetninga ekki vera að skila nægum árangri



Þá segir Hildur að við séum að sjá afleiðingar þess að fólk vanræki það að bólusetja börnin sín og þetta sé það sem Alþjóða heilbrigðisstofnunin varaði við.

„Það er alveg ástæða til að hugsa hvort við eigum að endurtaka tillöguna eða eigum við kannski að finna einhverja aðra leið. Mér hefur dottið í hug hvort að leikskólar og heilsugæsla eiga að fara í meira samstarf. Það má finna einhvern flöt á því en eitthvað þurfum við að gera.“

Bólusetningar ekki pólitískt mál

Aðspurð hvort hún haldi að tillagan hafi verið felld á sínum tíma vegna þess að hún kom úr „rangri átt“ segir Hildur það geta verið. Það virðist skipta máli hvaðan gott kemur en þannig eigi það ekki að vera, sérstaklega ekki í málum sem varða nær alla í samfélaginu.

„Þetta er náttúrulega ekki flokkspólitískt mál, þetta er bara heilbrigðismál og öryggismál.“

Þá segist Hildur hafa fundið mikinn meðbyr með tillögunni á sínum tíma enda sé foreldrum mjög annt um hag og heilsu barna sinna.

„Við flest förum og tryggjum börnunum okkar þessar almennu bólusetningar og þá er auðvitað ótækt að aðrir séu að setja börnin okkar í hættu sem sjá ekki um þetta,“ segir Hildur.

Hún segir það hafa verið nokkuð pirrandi að heyra af mislingatilfellum eftir að hafa reynt að koma í veg fyrir slíkt með tillögunni. Á þeim tíma hafi verið ljóst að grípa þyrfti til aðgerða og fara í fyrirbyggjandi aðgerðir.

„Maður óttast auðvitað að þessum tilfellum fari fjölgandi af því nú erum við svo opin fyrir umheiminum. Við erum að fá stríðan straum ferðamanna til landsins og við sjálf erum að ferðast um heiminn,“ segir Hildur og bætir við að við þurfum að passa upp á heilsu okkar og barnanna okkar.