Enginn getur sett sig í þessi spor

Ingibjörg Kolbeinsdóttir, viðskiptafræðingur og markaðsstjóri, missti Ingólf Bjarna Kristinsson, 29 ára son sinn úr sjálfsvígi árið 2017. Hún ákvað að stíga fram og segja frá reynslu sinni í nýrri þáttaröð Lóu Pind „Viltu í alvöru deyja?“ sem hefst á Stöð 2 í annað kvöld.

„Ég sagði stundum við Ingólf Bjarna þegar hann var á sínum versta tíma að ég vildi bara að ég gæti svæft þig í nokkur ár og farið í gegnum lífið fyrir þig og vakið þig þegar þú ert á góðum stað.“

Tugir Íslendinga svipta sig lífi á hverju ári. Að jafnaði eru það fjórum sinnum fleiri karlar en konur sem taka þessa síðustu skelfilegu ákvörðun í lífi sínu. Þau binda endi á sitt líf en eftir situr her af fólki, ástvinum, sem vita ekki sitt rjúkandi ráð.

Ingibjörg hefur þurft að glíma við djúpa sorg og sektarkennd frá því Ingólfur Bjarni fyrirfór sér á fimmtudegi í september árið 2017.

Fyrsti þáttur af fjórum í þáttaröðinni „Viltu í alvöru deyja?“ er á dagskrá Stöðvar 2 annað kvöld kl. 20:10.

Þar er rætt við móður, systur og dóttur tveggja einstaklinga sem hafa svipt sig lífi. Leikstjórn og handrit er í höndum Lóu Pind Aldísardóttur, myndatökumaður er Ívar Kristján Ívarsson og klippingu annaðist Ólafur Þór Chelbat.

Ef þú ert í sjálfsvígshugleiðingum:

Hringdu í Hjálparsíma Rauða krossins: 1717 - opið allan sólarhringinn.

Talaðu við netspjall Rauða krossins á raudikrossinn.is.

Eða pantaðu tíma hjá Pieta samtökunum: pieta.is.