Messan: De Gea hefur ekki varið víti í þrjú ár

David de Gea, markvörður Man. Utd, var í umræðunni í Messunni í gær enda hefur hann ekki varið víti síðan árið 2016.

Engin breyting varð á því í leik United gegn Arsenal í gær sem var fyrsta tap United í deildinni undir stjórn Ole Gunnar Solskjær. Vítið í gær var sextánda vítið í röð sem lekur inn hjá Spánverjanum.

„Það er eins og það vanti svolitla trú í hann í þessum vítum. Ég hafði aldrei áhyggjur af öðru en að hann myndi skora úr vítinu,“ sagði Reynir Leósson.

De Gea hefur auðvitað verið stórkostlegur í marki United og Messan velti því upp hvort hann væri yfir gagnrýni hafinn enda fáir að skamma hann fyrir lélega frammistöðu í vítaspyrnum.

„Hann er ekki yfir gagnrýni hafinn. Hann hefur ekki átt eins frábært tímabil núna og í fyrra þó svo hann hafi verið góður. Flestir hafa stigið upp síðan Solskjær kom inn en ekki hann. Engu að síður frábær markvörður,“ bætti Reynir við.

Umræðuna um United má sjá hér að neðan.