Segja ekkert benda til að tjörn Ed Sheeran sé sundlaug

Ekkert bendir til að tjörn sem breski söngvarinn Ed Sheeran hefur látið gera á lóð sinni í Suffolk sé sundlaug. Þetta er mat fulltrúa yfirvalda í bænum sem tóku út tjörnina eftir að kvartanir bárust frá nágrönnum sem sökuðu Sheeran um að hafa logið að yfirvöldum. Sökuðu þeir Sheeran um að byggja sundlaug, en undir yfirskini tjarnar.

Sky greinir frá því að í skýrslu fulltrúa yfirvalda komi fram að „engar sannanir séu fyrir hendi um að þetta sé ekki tjörn“. Plöntur vaxi bæi við og í tjörninni.

Í umsókn söngvarans til skipulagsyfirvalda í Suffolk sagðist hann vera að búa til tjörn sem myndi þjóna fuglum og öðrum dýrum á svæðinu. Nágrannarnir vildu hins vegar meina að ljóst væri að „tjörninni“ væri ætlað að gegna hlutverki sundlaugar enda væri búið að steypa fyrir tröppum og koma fyrir byggju, handriði og smáhýsi á bakkanum.

Óttast frekari framkvæmdir

Breski söngvarinn, sem heldur tónleika á Reykjavík í ágúst, lét reisa stórt hús á lóðinni fyrir um ári og lét svo koma fyrir nýrnalaga tjörn. Eftir að búið hafði verið að koma tjörninni fyrir sótti söngvarinn fyrst um tilskilin leyfi þar sem hann hét því að tjörnin myndi styðja við bakið á dýralífi á svæðinu. Hann fékk svo leyfi með því skilyrði að hún yrði ekki notuð sem sundlaug. 

Lóðina er að finna ekki langt frá Framlingham þar sem Sheeran ólst upp.

Nágrannarnir, Kenny og Carol Cattee, vildu meina að framkvæmdin hafi skaðað umhverfið á svæðinu. Sögðust þeir hafa áhyggjur af því að framkvæmdin muni svo vinda upp á sig og leiða til enn frekari framkvæmda. Cattee-hjónin höfðu áður kvartað til lögreglu vegna hávaða frá húsi Sheeran.