Jónatan og Stefán stýra KA næstu tvö árin

Stefán Árnason og Jónatan Magnússon verða þjálfarar KA næstu tvö árin en þeir skrifuðu undir samning við félagið í dag.

Stefán hefur stýrt liðinu frá 2017 og kom liðinu meðal annars upp í Olís-deildina. Hann hélt svo liðinu í deild þeirra bestu í ár.

Heimir Örn Árnason hefur verið aðstoðarmaður Stefáns en hann stígur nú til hliðar. Jónatan hefur verið þjálfari KA/Þór í Olís-deild kvenna síðustu tvö ár en framlengdi ekki samning sinn eftir tímabilið.

Þeir verða ekki bara með meistaraflokk félagsins því þeir halda áfram störfum sínum með yngri flokka félagsins. Jónatan er yfirþjálfari yngri flokka og Stefán hefur verið með afreksþjálfun.