Fjölskylda drengsins sem hvarf miður sín yfir gabbi síbrotamanns

Fjölskylda Timmothy Pitzen, sem hvarf fyrir átta árum, þegar hann var sex ára, er miður sín eftir að maður laug því að lögregluþjónum að hann væri Pitzen. Maðurinn sagði lögregluþjónum á miðvikudaginn að hann hefði sloppið úr haldi ræningja og vildi komast aftur heim.

Í ljós hefur komið að maðurinn, sem sagðist vera fjórtán ára gamall og heita Timmothy Pitzen, er í raun 23 ára gamall síbrotamaður sem heitir Brian Michael Rini. CNN segir honum hafa verið sleppt úr fangelsi í Ohio í síðasta mánuði þar sem hann afplánaði dóm vegna innbrots og skemmdarverka.

The man who falsely claimed to be Timmothy Pitzen, a boy who disappeared in 2011, was released from an Ohio prison last month after serving time for burglary and vandalism, court records show https://t.co/zMko5gr85Xpic.twitter.com/Bve45u6BkZ

— CNN (@CNN) April 5, 2019

Í maí árið 2011 kom móðir Timmothy í skóla drengsins í Aurora í Illinois og sagði kennurum að upp hefði komið neyðartilvik innan fjölskyldunnar og hún væri þar til að sækja hann. Timmothy var þá sex ára gamall. Þremur dögum síðar fannst hún látin á móteli og virtist hún hafa svipt sig lífi. Timmothy var hvergi sjáanlegur.

Seinna kom í ljós að móðir Timmothy hafði farið með hann í dýragarð og skemmtigarð og sáust þau á öryggisupptökum víða um Illinois. Hún skildi eftir sig miða þar sem hún hafði skrifað að Timmothy væri nú í höndum fólks sem myndi annast hann og elska. Hún sagði að hann myndi aldrei finnast.

Bílstóll Timmothy var einnig horfinn úr bíl hennar.

Foreldrar drengsins höfðu átt í vandræðum og móðir hans glímdi við mikið þunglyndi. Hún hafði minnst einu sinni áður reynt að svipta sig lífi.

Kara Jacobs, frænka Pitzen, segir síðustu daga hafa verið eins og að upplifa hvarf barnsins á nýjan leik. Faðir hans og aðrir fjölskyldumeðlimir séu niðurbrotnir. Þetta sagði Jacobs í gærkvöldi þegar hún og Alana Anderson, amma Pitzen, ræddu við fjölmiðla eftir að í ljós kom að ekki var um drenginn að ræða.

Þó þeim hafi margsinnis borist ábendingar um að Pitzner hafi fundist hafi þetta tilvik verið það efnilegasta hingað til.

Anderson sagðist alltaf hafa haldið í þá von að þegar Pitzen væri orðinn nógu gamall myndi hann finna fjölskyldu sína á nýjan leik, ef þau gætu ekki fundið hann. Hún sagðist viss um að hann gæti það því hann sé mjög snjall.

Hér má sjá myndbönd frá blaðamannafundinum í gær og viðtal við æskuvin Pitzner.