Kristianstad tapaði eftir tvöfalda framlengingu

Kristianstad er áfram sigri frá undanúrslitunum í sænsku úrslitakeppninni í handbolta eftir tap gegn Redbergslids, 38-37, í tvöfaldri framlengingu í kvöld.

Kristianstad hafði unnið fyrstu tvo leikina og vinna þarf þrjá leiki til þess að  koma sér áfram. Þriðji sigurinn kom því miður ekki í kvöld.

Staðan í hálfleik var 15-14, Kristianstad í vil, en Redbergslids jafnaði 40 sekúndum fyrir leikslok. Kristianstad fékk vítakast á lokasekúndunni en Viktor Hallén brenndi af vítakastinu.

Því þurfti að framlengja en í henni voru meistararnir og heimamennirnir í Kristianstad sterkari framan af. Gestirnir voru þó ekki af baki dottnir og náðu að jafna metin.

Staðan eftir fyrstu framlengingu var áfram jöfn, 31-31. Í annarri framlengingunni skoruðu gestirnir fyrstu þrjú mörkin og unnu að lokum, 38-37.

Arnar Freyr Arnarsson var markahæstur hjá Kristianstad með átta mörk en Ólafur Guðmundsson kom næstur með sjö mörk. Teitur Örn Einarsson skoraði eitt.