Þjálfari KR fór í markið og hélt hreinu

KR vann 2-0 sigur á FH í lokaleik B-deildar Lengjubikars kvenna sem fram fór á gervigrasvelli KR-inga í gærkvöldi þar sem þær Hugrún Lilja Ólafsdóttir og Betsy Hassett voru á skotskónum.

Í marki KR stóð þjálfari liðsins, hin serbneska Bojana Besic, en aðalmarkvörður KR, Ingibjörg Valgeirsdóttir, var fjarri góðu gamni.

Bojana stóð vaktina vel og hélt marki sínu hreinu en þetta var í fyrsta skiptið í vetur sem hennar lið heldur hreinu í Lengjubikarnum. KR hafnaði í 3.sæti B-deildarinnar en Fylkiskonur unnu deildina örugglega með fullt hús stiga.

Bojana er 39 ára gömul og lék á árum áður með Þór/KA en þá oftast í stöðu varnarmanns.

KR-konur hefja leik í Pepsi Max deildinni fimmtudaginn 2.maí næstkomandi þegar þær heimsækja HK/Víking í Kórinn.

Á meðan fyrsti leikur í PMDKA fór fram spilaði Bojana Besic þjálfari mflkv. KR heilan leik í markinu í Lengjubikar B. Clean sheet. Geri aðrir betur.

— Edda Garðars (@eddagardars) April 26, 2019