Emery: Fjórða sætið er í okkar höndum

Unai Emery, stjóri Arsenal, segir að Arsenal sé með fjórða sætið í sínum höndum fyrir lokaumferðirnar í enska boltanum.

Arsenal mætir Wolves á útivelli annað kvöld en Arsenal er í fimmta sætinu með 66 stig en á þó leik til góða á Chelsea sem er í fjórða sætinu.

„Við erum með þetta í okkar höndum. Í byrjun tímabilsins og eftir veturinn vorum við í vandræðum á töflunni,“ sagði Emery á blaðamannafundi í dag fyrir leikinn annað kvöld.

„Við munum ekki breyta okkar stefnu. Við erum í góðri stöðu að ná okkar fyrsta markmiði. Lykilatriðin eru núna og leikurinn á morgun er stór leikur fyrir okkur.“

„Þetta er gott tækifæri til þess að sýna og gera allt hvað við getum en samt sem áður með gáfum. Við þurfum að spila með hjartanu en samt sem áður vera klárir í höfðinu.“