Hollendingurinn svo sannarlega fljúgandi í Tel Aviv

Ekkert virðist geta haggað Duncan Laurence þegar kemur að mati veðbanka á líklegum sigurvegara í Eurovision þetta árið. Hollendingurinn, sem situr við píanóið og syngur lagið Arcade, hefur eignað sér toppsæti veðbankanna í mars og hafa sigurlíkur hans aðeins aukist síðan.

Þegar þetta er skrifað er síðari undanúrslitariðlinum nýlokið og fyrir liggur hvaða 26 lönd keppa í úrslitum á laugardaginn. Reikna mátti með að einhverjar sviptingar yrðu hjá veðbönkum að undanúrslitum loknum og má merkja nokkrar. Hollendingurinn virðist hins vegar aðeins styrkja stöðu sína og kólnar á toppnum.

Taldar eru 41% líkur á því að Duncan Laurence fari með sigur af hólmi og hafa líkurnar hækkað um 3% í kvöld.

Ástralir eru komnir í annað sætið fyrir ofan Svía en báðar þjóðir hafa um 9% sigurlíkur. Þá koma Rússar með 7% líkur á sigri, Ítalir með 5% og Svisslendingar eru komnir upp fyrir Ísland í sjötta sæti listans með um 4% sigurlíkur, eins og Ísland.

Fróðlegt verður að fylgjast með stöðu mála hjá veðbönkum í kvöld og á morgun. Duncan Laurence ætti þó áfram að geta sofið vært á koddanum sínum og notið góðs gengis. Hann á þó enn eftir að hitta á réttu tónana á laugardagskvöldið.

Flutning Laurence frá í kvöld má sjá að neðan og hér má fylgjast með gangi mála hjá veðbönkum.