Foreldrafélag Hatara fékk að fljóta með pressunni í blaðamannahöllina

Hatari er með þétt stuðningsnet í Tel Aviv en foreldrar þeirra eru flestir hverjir mættir utan til að standa við bakið á sínu fólki. Nú þegar 75 mínútur eru í að Hatari stígi á svið er hópurinn mættur í höllina vopnaður íslenska fánanum, bjartsýni og góða skapinu.

Fjölmiðlum býðst að taka litlar rútur, svokallaðar skutlur, í keppnishöllina. Endastöðin er rétt við hótel íslenska hópsins og fengu foreldrarnir þau skilaboð að þau gætu farið með rútunni upp í keppnishöllina.

Til þess að fá far með rútunni þarf hins vegar að framvísa passa, þ.e pressupassa eða að vera hluti af keppnisteymi hverrar þjóðar. Foreldrarnir höfðu engan slíkan passa og stefndi í leit að leigubíl til að ferma flotann upp í keppnishöll.

Bekkurinn var þétt skipaður í rútunni en foreldrarnir, með bros á vör, náðu að fara yfir málin með rútubílstjóranum sem horfði í gegnum fingur sér og hleypti foreldrafélaginu um borð.

Að neðan má sjá myndir úr rútunni og ljóst að Hatari á gott bakland sem mun styðja sitt fólk í blíðu og stríðu.